Huli sa nagluluyang pag-uswag kan ekonomiya kan Pilipinas asin namamantinir na hababa an inflation sa target range, piglalaoman na mapadagos an Bangko Sentral ng Pilipinas (BSP) sa pagbawas kan interest rate hasta 2026, sigun sa sarong unit kan Fitch Solutions.
Pigsaysay kan BMI, an research unit kan Fitch Solutions, sa sarong report na posibleng ibaba kan BSP an policy rate sa 4.5 porsyento antes matapos an taon, kasunod kan desisyon kan Oktubre 9 na ibaba an benchmark interest rate sa 4.75 porsyento.
An pinakahuring pagbawas an ikaapat na sunod-sunod na rate cut kan BSP ngunyan na taon.
Pighurot man kan BSP kan Oktubre 30 na pwedeng nasa pag-ultanan kan 1.4 porsyento hasta 2.2 porsyento an inflation para sa bulan.
Piglalaoman kan BMI na an average inflation mapakol sa 1.6 porsyento antes matapos an 2025.
An inflation puon Enero hasta Setyembre nagpakol sa average na 1.7 porsyento, basado sa datos kan BSP.
Mientrastanto piglalaoman an dugang na easing sa 2026, kun saen pigkakarkulong mababa pa an rate sa 4 porsyento antes matapos an taon, mantang naglalangkaw an inflation huli sa posibleng paglangkaw kan singil sa kuryente asin mas halangkaw na taripa sa pag-angkat kan bigas.
Mientrastanto, padikit-dikit nagluluya an kantidad kan piso pasiring 59 kada US dollar antes matapos an taon, asin ma-average sa 58 sa bilog na 2025.
Kasuarin sana, nagbagsak an kantidad kan piso sa pinakamababang antas sa historya makalihis magsarado sa 59.13 kontra US dollar kan Oktubre 29, na sigun sa BSP kawsa kan kontrobersiya sa korapsyon katakod kan mga proyekto sa imprastruktura.
Sa ibong kaini, pigsabi kan BMI na nagtitinir na preparado an BSP na maneharon an pagluya kan piso, na pigsusuportaran kan gross international reserves na $108.8 bilyon kan Setyembre.
