Pig-aadalan na kan Armed Forces of the Philippines an pagbakal nin dugang pang mga barko na gagamiton sa pagpatrolya sa kadagatan orog na sa West Philippine Sea.
Huli kaini, an paghirahay asin pagpahiwas kan mga pantalan, base militar asin pantalan militar sa nasyon an pinaglalapigotan.
Segun sa hepe kan AFP na si Gen. Romeo Brawner Jr., dipisil magbakal nin mga barko kun mayo man nin magkakanigong pantalan na ilalaag kaini.
Kaipuhan suboot na mapauswag an mga baseng militar o naval kan AFP huli ta ini an nagseserbing mayor na sistema nin suporta sa mga babakalon na barko kan nasyon.
Segun pa sa hepe kan AFP, pwedeng gamiton an siring na mga barko sa pagpatrolya sa mga maritime features kan nasyon sa WPS asin mamantenir an presensya kan Pilipinas sa mga ini.
Nagkapira sa mga darakula asin advanced na barko kan nasyon iyo an BRP Jose Rizal na pigdeliver kan Mayo 2020 asin BRP Antonio Luna na pigdeliver kan Marso 21, 2021.
Sa irarom kan programa sa modernisasyon kan AFP, plano kan Pilipinas na magbakal nin mga advanced ship para sa Philippine Navy asin mas dakol na multi-role fighter jets para sa Philippine Air Force.
