Aram baya nindo mga ka-bombo si Wei Dongyi, saro sa mga pinakasikat na mathematicians sa China an kasuarin sana liwat na nagin viral huli sa saiyang simple asin matipid na pagbuhay.
Si Dongyi an ipinangaki kan 1991 asin sa amay na edad ini an nagpahiling na kan potensiyal na tibay sa mathematics.
Kan ini magtungtong sa high school nagpuon nang magin laog kan mga bareta sa China kan maipuli an gold medals para sa pagkakaigwa nin perfect scores sa pigkundusir na 49th asin 50th International Mathematical Olympiads.
An saiyang achievements nagin dalan tanganing makapag-enroll sa sikat na Peking University maski dae nag-agi sa college exam.
Makalihis ini nagin saro man sa mga respetadong paratukdo sa nasambitan ng unibersidad.
Alagad sa ibong kan saiyang kasikatan huli sa pagiging math genius, mas nakikilhag an publiko sa simple asin modesto na awra kaini.
Susog pa sa report, an nagagastos sana soboot ni Wei Dongyi kada bulan nagpapakol sana sa 300 yuan o $40.
Mientrastanto, igwang tinabangan si Dongyi nin grupo kan doctoral mathematicians na nadidipisilan sa complex model na saindang pig-aadalan.
Sigun sa grupo huli sa tibay ni Dongyi sa math nakapasar an saindang mathematical model asin nakakua nin 96% passing rate.
Kun kaya komo pagpapasalamat saindang pigtangro na bayadan ini alagad nagsayuma si Dongyi asin sinaysay na simple man sana an saiyang naitabang.
Alagad padagos an saindang pag-enkaminar ki Dongyi na akuon an saindang bayad kun kaya sa huri nagtugot na sana ini na i-renew an saiyang tansportation card komo kompensasyon.
Kasuarin sana nagkaigwa naman nin sadiring social media accounts si Dongyi kun saen mahihiling an saiyang pagpapabisto kan sadiri.
Katakod digde, huli sa kasimplehan kan math genius nagpakol tolos sa 23 million subscribers an saiyang acocunt sa laog sana nin limang aldaw.
Alagad piglinaw man kan saiyang pamilya na mayo ining plano na maging influencer mawot sana soboot kaini na maiheras an saiyang passion sa math sa bilog na kinaban sa paagi kan social media.
