Bakong ‘bloodbath’ siring kan pagsasaladawan ni Vice President Sara Duterte an mangyayari na impeachment trial sa Senado, nin huli ta para ini sa paghahanap nin katotohanan asin man paninimbagan.
Ini an kasimbagan ni House Deputy Majority Leader Lorenz Defensor, sarong miyembro kan House prosecution panel sa nagin pahayag kan Bise Presidente na mawot kaining magin madugo an impeachment trial.
Sinaysay ni Defensor na parehong dapat magin andam an prosecution asin man defense panels sa paglalahad kan saindang kaso sa Senado, na masirbing impeachment court sa pagbubukas kan Ika-20 Kongreso.
Sigun ki Defensor, magigin mas marikas para sa taumbayan na akuon an ano man na kaluluwasan kan paglilitis—magin guilty man o dae an hatol ki Duterte.
Marurumduman na kan nakalihis na bulan nin Pebrero, antes na mag-adjourn an sesyon, pinagtibay kan Kamara de Representantes an Articles of Impeachment laban ki Duterte makalihis ining pagtibayon kan haros gabos na miyembro.
Inakusaran si Duterte nin culpable violation of the Constitution asin betrayal of public trust huli sa soboot salang paggamit kan confidential funds kan Office of the Vice President asin man komo sekretarya kan Department of Education na dae kaini sinimbag sa mga pagdangog kan Kamara.
Tinawan duon ni Defensor na an impeachment kan sarong halangkaw na opisyal an bako sarong judicial proceeding, kundi man sarong political process na pinamamayuhan kan Konstitusyon asin man nasa kapangyarihan kan lehislatura.
