NAGA CITY- Nagtutubod si Naga City Mayor John Bongat na mayong epekto sa ciudad an impormasyon na nangenot ini sa datos kan Crime Research and Analysis Center kan PNP Directorate for Investigation and Detection Management (DIDM) sa igwa nin pinakahalangkaw na monthly crime rate sa bilog na nasyon.
Susog sa alkalde, mayong dapat na ikaalarma an mga namamanwaan huli ta mahihiling man an pagbaba sa index crime rates sa ciudad basado sa datos na piglalatag sa peace and order council (POC) meetings.
Sa ibong kaini, pigsugo na suboot ni Bongat si Naga City Police Office (NCPO) Director PS/Supt. Jonathan Panganiban para pag-adalan an nasambitang impormasyon asin pag-oolayan ining liwat sa masunod na POC Meeting.
Pigsierto man kan alkalde na nagtitinir na normal an kamugtakan sa ciudad asin mayong nangyayaring makangirhat na krimen digdi.
Pagirumdom na sana ni Bongat na magtenir na alertado asin magdoble ingat an gabos para makalikay na mabiktima nin anuman na krimen.
