NAGA CITY- Prangkang sinaysay ni Magdalo partylist Rep. Gary Alejano na kulang sa direksyon asin liderato an enot na taon sa pwesto ni presidente Rodrigo Duterte.
Sigon sa kongresista, pag-abot sa sektor nin seguridad asin depensa kan nasyon, mayo siyang nahihiling na organisasyon sa gobyerno.
Dae man suboot nagkakaparareho an pahayag kan mga ahensya kan gobyerno huli sa kawaran nin direksyon hale sa hepe ehekutibo.
Nariribong na suboot an mga miyembro kan gabinete kun ano an dapat nindang gibuhon huli naman ta dae ninda aram ano an mawot na mangyari kan presidente sa Pilipinas.
Sigon ki Alejano, nagsieserbeng tagapaliwanag na sana an mga miyembro kan gabinete sa pigbubutasang mga pahayag ni presidente Duterte.
Mientrastanto, bagsak man suboot an foreign policy kan presenteng administrasyon huli naman sa pagluya kan pakikipag-alyansa sa mga haloy ng kaalyado kan Pilipinas.
Dugang pa kan kongresista, sa pakikipag-alyansa kan Pilipinas sa China, nagluluwas na pigsuko na kan presidente an diretsos pag-abot sa pinag-iiriwalang teritoryo sa West Philippine Sea.
Mayo man suboot siyang nahihiling na pagbabago asin mas lalong naglala pa an haloy ng problema sa nasyon urog na an pag-abot sa trapiko.
