Nanindugan an presenteng sekretaryo kan Department of Interior and Local Government (DILG) na si Secretary Juanito ‘Jonvic’ Remulla na mayong dakulang pagbabago sa serbisyong dara kan Philippine National Police.
Makakasierto soboot an publiko na mapadagos pa man an mga programa kan Pambansang Pulisya sa mga responsibilidad asin trabaho kaining mamantinir an kaayusan, kasalbaduhan asin katoninongan kan nasyon.
Ini an kasunod kan pagkakahali gikan sa pwesto ni dating Philippine National Police Chief Police General Nicolas Torre III na iyong pig-anunsyar kasuodma, Agosto 26, 2025.
Hurot ni Secretary Remulla, alagad maski nagkaigwa nin pagriribay kan liderato, piglalaoman pa man ninda na ipagpapadagos ni Philippine National Police Officer-in-charge Police Lieutenant General Jose Melencio Nartatez Jr. an pinuonan kan saiyang niribayan.
Kaya an paglulunsar kan unified 9-1-1 Hotline kan gobyerno, 5-minute rule response kan pulisya asin iba pang programa an ipagpapadagos pa man giraray.
Mantang saiya man na pinahimutikan na igwa ining kinaaraman sa pagkakasibak ki former PNP Chief Police General Nicolas Torre III.
Pigtawan-linaw kan nasambitan ng sekretaryo na bako ini kaining direktiba kundi ‘prerogrative’ kan presenteng Presidente na si President Ferdinand ‘Bongbong’ Marcos Jr.
Magin an rason kun tano sinibak an nasambitan ng opisyal an saiyang pinahimutikang paramientras na iheras asin pigpapaubaya na sana sa Presidente.
Alagad maski sinibak o hinali sa posisyon komo hepe kan Pambansang Pulisya, saro pang utro na pigtawan-linaw ni Secretary Remulla na bako ini huli sa igwang pigbalgar soboot si Philippine National Police Chief Police General Nicolas Torre III.
Nagkaigwa soboot nin mga pag-urulay sa pag-ultanan ninda kaibahan an Presidente.
Mientrastanto huli sa pagkakatalaga ni Philippine National Police Officer-in-charge Police Lieutenant General Jose Melencio Nartatez Jr. sa saiyang panibagong posiyon, saiyang ipinaabot an mensahe kan pagigin maogma.
Makakaasa soboot an publiko na saiyang itataguyod an integridad kan Pambansang Pulisya asin matalima sa mga kamawotan kan Presidente.
