NAGA CITY- Aminado an tagapagtaram kan Bureau of Fisheries and Aquatic Resources (BFAR) Bicol na ikinabigla niya an bareta na nagadan sa pigkondusir na drug raid sinda Ozamiz City Mayor Reynaldo Parojinog asin 14 iba pa.
Sigon ki Nonie Enolva, tagapagsataram kan BFAR-Bicol, sa pagbisita ninda sa Ozamiz City kan nakaaging Enero, narisa ninda na igwang magagayon na programa an lokal na gobyerno kan Ozamiz para sa fisheries sector.
Nahiling man suboot ninda kun gano pigrerespeto kan mga residente sa nasambitang ciudad an alkalde asin an mga Parojinog kun kaya labi niyang ikinabigla kan maaraman niyang nagadan an nasambitang opisyal asin an pamilya kaini apwera pa sa pagkakaimbwelto sa illegal drug trade.
Napag-araman na apwera sa livelihood projects, igwa pang scholarship programs an LGU-Ozamiz para sa mga parasira sa lugar.
