NAGA CITY – Pigsierto kan MDRRMO-Milaor na pirmeng preparado an saindang lado sa panahon kan kalamidad orog na ngunyan na tag-uran.
Sigun ki Verdadero Jr kan MDRRMO-Milaor, sinaysay kaini na nagpapasiring an saindang mga personahe sa pangengenot kan saindang head sa mga barangay asin nag-aatender kan barangay assembly tanganing ipahatod sa mga residentes an mga dapat asin dae dapat sa panahon kan kalamidad.
Sa paagi soboot kaini, naaraman kan mga tawo an saindang dapat na gibuhon tanganing malikayan na magkaigwa nin casualties sa panahon kan kasiributan.
Dugang pa kan opisyal, igwa man na pigtalagang evacuation area sa saindang banwaan asin igwang mga partner na eskwelahan asin barangay shelter na pwedeng madagusan kan mga tawo orog na sa mga nasa low lying areas siring kan Barangay Del Rosario, Balagbag, Flordeliz, Borong-borongan, San Jose asin iba pa.
Tinawan duon pa kan opisyal na enkaso igwang low pressure area, nag-iikot man an mga Operation officer tanganing siertuhon na salbado an gabos.
Sa ngunyan, hagad na sana ni Verdadero an pakikipagtabangan kan gabos tanganing mayong mairehistro na casualties sa panahon kan kalamidad.
