Nakatalaan na ipatugdok an sarong state-of-the-art cold storage facility na nagkakantedad nin nasa P500 million.
Ini an piglalaoman na magigin operational sa January 2026, sigun ki Department of Agriculture (DA) Secretary Francisco Tiu Laurel Jr.
Sigun sa opisyal, an pasilidad na ini an pigsaladawan ni Laurel komo higanteng higanteng refrigerator na kaipuhang imantinir sa 5 degrees Celsius.
Ini an pigdesinyo tanganing mapreserba an kapreskuhan kan mga agricultural commodities siring kan mga gulay, livestock products, asin magin an mga banhi.
Sa paagi kaini, mas mamamanehar kan mga paraoma an saindang pag-imbentaryo asin pagdetermina kun anong panahon an mas nagkikita.
Mientrastanto, an nasambitan na lakdang an susog sa kasuguan ni Presidente Ferdinand Marcos Jr. tanganing matabangan an mga paraoma na magkita asin magkaigwa nin mas kontrol sa mga marketing.
An nasambitan ng pasilidad an makukua sa San Jose village sa probinsiya nin Camarines Sur.
Katabang man kan ahensiya an provincial government kan Camarines Sur na kun saen mabugtak man nin 10-hectare na “Bagsakan ng Bayan” — sarong centralized trading post na iyong maserbe sa mga paraoma gikan sa Albay, Sorsogon, Catanduanes, Masbate, Camarines Sur asin Camarines Norte.
An trading post na ini an ipapatindog kataid kan cold storage facility. Sa ngunyan, pighihiling na magigin major agricultural hub ini sa bilog na Rehiyong Bikol.
