NAGA CITY- Nagpapadagos an pigsasagibong flushing kan Market Enterprise and Promotions Office-Naga sa may parte kan Naga City People’s Mall makalihis an panlalamasa kan Bagyong Kristine.
Sa entrevista kan Bombo Radyo Naga ki Ramon Florendo, pamayo kan MEPO-Naga, sinaysay kaini na aldaw-bangi an saindang flushing katabang an mga available na empleyado kan saindang opisina.
Pigsierto man kan opisyal na padikit-dikit, mahahali na an tambak na basura na yaon sa palibot kan NCPM orog na ta padagos man an saindang paglalapigot tanganing tolos na maibwelta an operasyon sa nasambitan ng merkado.
Sigun pa ki Florendo, kakulangan kan tubig asin kuryente an saindang pino-problema sa presente orog na ta haros an 1st floor kan NCPM an nadanyaran kan bagyo kabali na digde an tinadahan kan feeds, dry goods, parlor, prutasan, karinderya asin iba pa.Padagos man soboot na iche-check kan saindang opisina an listahan kan mga vendors na naapektaran.
Sa ibong na lado, namumundo man an opisyal nin huli sa nangyaring looting incident sa ibong kan naeksperyensiyahan na kalamidad. Dae soboot ini piglaoman kan saindang lado nin huli ta madiklom, baha sa area kun saen nahabunan an ibang stall, alagad tangani soboot na bakong magabat sa pagmate, pig-isip na sana kan opisyal na nangyari an siring na insidente huli sa sitwasyon kan mga tawo asin labing pangangaipuhan.
Sa ngunyan, dagos-dagos an pagta-trabaho kan mga personahe kan MEPO-Naga tanganing maibwelta an operasyon sa NCPM.
