Mantenidong bastante asin normal an supply nin tubig sa syudad nin Naga, segun sa Metro Naga Water District o MNWD, sa ibong kan pagbabago kan kamugtakan kan panahon ngonian na taon.
Sa intrevista kan Bombo Radyo Naga ki Choppy Dela Cruz kan PIO-MNWD, ipinaliwanag kaini na padagos na nasa marhay na kondisyon an mga pinagkukuanan nin tubig sa ciudad. Segun sa ahensya, dae piglalaoman na maeksperyensyahan nin grabeng tigmara o epekto kan El Niño an lugar kun kaya mantenidong stable an produksyon asin distribusyon kan tubig.
Dugang pa kaini, igwa nin supisyenteng reserba an saindang mga pasilidad tanganing masimbagan an pangangaipo kan mga residente. An mga uran kan nakaaging taon nakatabang man na maglangkaw an lebel kan tubig sa mga burabod, na an nagkapirang reservoir nakaabot sa pag-awas.
Dugang pa, an lebel kan mga pinagkukuanan nin tubig sa irarom kan daga, kaiba an mga hararom na bubon na ginagamit bilang dagdag na suplay, nagdadanay na halangkaw.
Sa ngunyan, inasegurar kan MNWD na padagos nindang babantayan an kondisyon kan supply nin tubig ngani na maseguro an padagos na serbisyo sa publiko, urog na sa tahaw kan nagbabagong kamugtakan kan panahon.
