Hinamon kan mga abogado ni dating Presidente Rodrigo Duterte an hurisdiksyon kan International Criminal Court (ICC) katakod kan mga kasong crimes against humanity na pig konektar sa madugong kampanya kontra droga kan saiyang administrasyon.
Sa saindang pagsusumiter sa ICC kan nakalihis na Mayo 1, 2025, pighurot ninda Atty. Nicholas Kaufman asin man Dr. Dov Jacobs na dae na pwedeng gamiton kan korte an hurisdiksyon kaini sa Pilipinas makalihis an pagkalas kan nasyon sa Rome Statute kan nakalihis na Marso 17, 2019.
Sigun sa sainda, malinaw sa ley kan ICC na dapat ay miyembro pa an sarong nasyon sa oras nin pagsasakdal.
Soboot, kan magpuon an imbestigasyon asin magluwas nin desisyon an Pre-Trial Chamber, naglampas na sa petsa nin withdrawal kan Pilipinas, kaya man mayo na ining legal na basehan.
Tinuligsa man ninda an Prosecution sa soboot kalituhan kaini sa pag ultanan kan hurisdiksyon asin man mga kundisyon kan paggamit kaini. Pigtuyaw man ninda an pagbanggit sa Article 127 (2) kan Rome Statute, na soboot dae dapat ipautob sa kaso ni Duterte.
Alagad sigun sa ICC, nagtitinir an hurisdiksyon kaini sa mga krimeng nangyari mantang miyembro pa an Pilipinas.
Sa report kaini kan nakalihis na Marso 12, sinaysay kan korte na igwa nin reasonable grounds tangani pagtubudang si Duterte an may paninimbagan komo indirect co-perpetrator sa rinibong kaso nin paggadan sa pag ultanan kan Nobyembre 1, 2011 asin Marso 16, 2019.
Dugang pa kan ICC, may matibay na ebidensiya na an mga pag-atake kontra sa sibilyan an isinagibo komo parte kan polisiya kan estado asin kan Davao Death Squad na soboot pamamayuhan ni Duterte kaidto.
Naarestar si Duterte kan nakalihis na Marso 11, 2025 pag abot gikan sa Hong Kong. Sigun sa warrant of arrest, ini soboot an nagtatag, nagpondo, asin nag-armas sa mga grupong imbwelto sa mga panggagadan.
Dinara ini sa The Hague, Netherlands tangani soboot atubangon an mga akusasyon.
