NAGA CITY- Padagos an pigsasagibong roving patrol kan mga Barangay tanod kan Barangay San Francisco, Naga City kasabay sa nagpapadagos na Simbang gabi.
Sa entrevista kan Bombo Radyo Naga ki Efren Nepomoceno, Barangay Kapitan kan nasambitan ng lugar, sinaysay kaini na sa pirang aldaw na pagkundusir kan nasambitan ng Simbang gabi nagtitinir na matuninong an saindang lugar asin mayo pa man nairehistro na kariribukan.
Sigun sa opisyal, mandato sa saindang mga barangay tanod katabang an mga kapulisan na magtao nin asistensiya sa mga mangangaipuhan kaini asin pagsierto na salbado an palibot kan simbahan orog na ta haros ribong mga tawo an nagdadagsa sa saindang area.
Dugang pa kan Kapitan, padagos an saindang pag-abiso sa mga barangay tanod na magin mapagmatyag partikular sa mga hiro kan mga jovenes nin huli ta kadalasan na an mga ini an imbwelto sa siring na kariribukan tuyong igwang siring na kasiributan.
Apwera sa pagbantay sa mga jovenes, pigsisita man soboot kan saindang mga Barangay Tanod an mga kajovenan na nagsisigarilyo o kaya man an nagva-vape.
Sa ngunyan, nagpasalamat na sana an opisyal sa presensiya kan mga kapulisan nin huli ta dakula soboot ining katabangan sa pagmantinir kan paz y orden sa saindang lugar.
