NAGA CITY- Nanindogan ngonian an pamayo kan Department of Social Welfare and Development (DSWD) Bicol na si Regional Director Arnel Garcia na dae dapat pasakitan kan lokal na gobyerno asin kan Municipal Social Welfare and Development Office (MSWDO) an mga benepisyaryo na nakaresibe nin Emergency Shelter Assistance (ESA.)
Ini enkoneksyon sa nagin pahayag kan mga opisyal kan banwaan nin Lagonoy na dapat magsumiter nin resibo an mga benepisyaryo na mapatotoong ginamit an kwarta sa mga materyales para sa pagpapairahay nin harong.
Segun sa director, dae kaini dapat maghagad an lokal na gobyerno huli ta dapat na maitao an kwarta sa mga residente na mayo nin ibang hahagadon na rekisitos.
Apwera digdi, segun ki Garcia, kun desidido an mga residente, pwedeng magsurat an mga ini nin complaint letter asin ipadara sa saindang opisina para sa maninigong aksyon.
Apwera digdi, pwede man suboot na magreklamo an mga tawo sa Ombudsman, tangani na masusog an mga tawong igwa nin paninimbagan sa nasambitan nang isyu.
Segun pa sa opisyal, pigpapangalad an mga siring na sistema sa pag-release nin ESA asin solamenteng an Lagonoy sana suboot an igwa nin problema na kontra sa totoong proseso kan pagtatao kan kwarta.
Kun marurumduman, mismong an sarong opisyal sa Barangay Burabod sa parehong banwaan an nagkumpirmar na kaipuhan na magsumiter kan mga benipisyaryo nin resibo tangani na masierto na napaduman sa materyales para sa saindang pagpapakarhay kan harong an tinagamang kwarta kan gobyerno.
