Nanindogan si International Criminal Court (ICC) assistant to counsel Kristina Conti na dapat dangugon muna an boses kan soboot mga biktima kan drug war ni dating Presidente Rodrigo Duterte antes ini gawaran nin interim release.
Marurumdoman, pighurot kan kampo kan dating presidente na magawaran ini nin paramientras na pagkakalibre na kun maaaprubaran, paramientras ining makakaluwas gikan sa detention facility kan ICC pasiring sa sarong dae na pigsambit na nasyon.
Pigkumpirmar man kan ICC prosecutor an saindang ‘non-opposition’ o dae ninda pagsusurog sa kahurota kan dating presidente.
Duon ni Atty, Conti, an perspektibo kan mga biktima an kasing-halaga kan sadiring perspective kan defense asin kan prosecution team, kaya dapat muna ining dangugon kan international tribunal.
Pigbatikos man kan abogado an claim kan defense team na nakaulay na ninda an prosecution asin an kinatawan kan sarong nasyon na pabor na kupkupin an dating presidente enkaso man pagbigyan an kahurotan para sa interim request.
Sigun ki Conti, dapat muna ining kumpirmaron kan ICC nin huli ta parehong self-serving an mga nasambitan ng pahayag, asin mayo pang kasiertohan kun totoong ginibo an mga ini.
Pighagad kan abogado, na dapat an matawan nin pagkakataon an mga biktima kan drug war na saiyang kinakatawan, tanganing ihayag an mga rason kan saindang pagtutol sa nasambitan ng lakdang.
Sa ibong kaini, pigsierto ni Conti na dawa posibleng mapagbigyan an kahurotan kan kampo ni Duterte para sa interim release, dae ini nangangahulugan na magiging libre na ini nin dagusan nin huli ta magigin istrikto pa man an ICC sa saiyang mga aksyon siring kan pakikipag-ulay sa mga mamamahayag.
