Aram baya nindo mga ka-bombo, sarong sadit na siyudad sa California na inaapod na Carmel-by-the-Sea an pamoso huli sa panundon na kaipuhan muna na maghagad kan mga bisita nin official permit tanganing legal na makapaglakaw gamit an heels na igwang langkaw na labi sa two inches.
Kun para sa iba an panundon na ini an maikokonsederar na urban myth, alagad ini an totoo asin saro sa mga official requirement sa Monterey city.
Enkaso an heels kan sarong babae o sarong indibidwal an labi sa two inches an langkaw asin hababa sa square inch kan surface, ini an maikokonsederar na illegal na suluton enkaso mayong permit na gikan sa city hall.
An permit an pigtatao na mayong bayad asin an mga bisita nagkukua kaini komo souvenir maski mayong plano na magsulot nin high heels.
An sertipikasyon na ini an magayon asin pig-issue sa pangaran mismo kan indibidwal na nagre-request asin pigpirmahan kan city clerks na naka duty.
Igwang ley sa lugar na pigkokonsederar na ilegal an pagsulot nin high-heels sa mga pampublikong tinampo kan Carmel-by-the-Sea na naaprubahan kan 1963 sa request kan City Attorney.
Obheto kan nasambitan ng ley na malikayan na masunadan nin kaso an siyudad enkaso igwang madapa o magbungkaras na mga insidente sa mga indibidwal na nagsusulot nin high heels sa saindang lugar.
An nasambitan kaya na siyudad an bistado sa kadakol na cypress asin Monterey Pines na nagdadakula nin marhay na kun saen an saindang mga ugat an nagpapasiring na sa mga concrete sidewalks na peligroso enkaso dae mahiling kan sarong tawo asin sinda an madapa.
An mga kapulisan sa lugar dae man mahigot an pag-implementar kan kakaibang ley na ini alagad enkaso an sarong tawo an madapa mantang nakasulot kan high heels dae ninda pwedeng kasuhan o ireklamo an siyudad.
Sa ngunyan, manlaen-laen pa man giraray an reaksyon kan mga tawo enkaso nadadangog ninda an nasambitan ng kakaibang panundon.
