NAGA CITY- Gadan an sarong motorista makalihis na magsalpok an piglulunadan nindang motorsiklo sa nakaparadang tricycle sa banwaan nin Bombon, Camarines Sur.
Sa nagunong impormasyon kan Bombo Radyo Naga, napag-araman na enot na nagsalpok an motorsiklo na minamaneho ni Richard Asnan sa sarong poste sa barangay San Roque sa nasambitang banwaan antes ini makabangga sa sarong nakaparadang tricycle.
Irido an driver na si Richard mantang pigdeklarar man na dead on arrival sa ospital an backrider kaini na si Anatilio Asnan na saiyang tiyuon.
Napag-araman na pasiring kuta na sa ciudad nin Naga an magtiyuon asin pareho suboot na burat an mga ini kan mangyari an aksidente.
Mayo man naipahiling na driver’s license an driver kan motorsiklo sa mga otoridad.
Nangyari an aksidente pirang oras antes an pagpoon kan taunang Alay-Lakad pasiring sa banwaan nin Calabanga kun saen pigpapartisiparan ini nin rinibong mga deboto.
