NAGA CITY- Inagi kan mga kapulisan an saindang paglaban sa iligal na droga sa sarong fashion show na pigkondusir sa Plaza Quince Martires sa ciudad nin Naga.
An nasambitang advocacy fashion show pigkondusir sa pangengenot kan Modelo Bikolano model trainer na si Anjo Santos katabang an Camarines Sur Police Provincial Office (CSPPO) asin an lokal na gobyerno kan ciudad nin Naga.
Sa entrevista kan Bombo Radyo Naga ki Santos, sinaysay kaini na obheto kan nasambitang aktibidad na ipahiling sa publiko na dae dapat na kinakatakutan an mga pulis.
Mawot man suboot nindang maipahiling na kayang makipagsabayan kan mga kapulisan urog na kan mga chief of police pag-abot sa mga light shows asin bako sana sa mga seryosong operasyon.
Mientrastanto, labi man an pasasalamat ni P/Supt. Errol Garchitorena, chief kan Police Community Relations (PCR) kan PNP Camarines Sur sa Modelo Bicolano sa pagpili sa saindang linyada na mapabale sa aktibidad.
Sigon ki Garchitorena, mawot ninda na maipaabot sa publiko sa paagi kan nasambitang fashion show an sarong matuninong na paagi sa paglaban sa iligal na droga.
