NAGA CITY – Nairehistro sa siyudad nin Naga an duwang kaso nin rabies.
Sa entrevista kan Bombo Radyo Naga ki Dr. Johan Michael R. Sales, OIC kan City Veterinary, sinaysay kaini na posibleng an mga straydogs na mayong bakuna an pinagigikanan kan nasambitan ng problema.
Sigun ki Sales, an saro sa duwang biktima an nag eedad 7-anyos asin taga Brgy. Carolina. Liwat na nangapudan si Sales na pabakunahan an mga ido tanganing maibitaran an kaso nin rabies orog na ngunyan na mainit an panahon.
Katakod digde, pigsierto man kan opisyal na padagos an saindang paglilibot sa mga kaharongan para sa saindang anti rabies vaccination campaign.
Mientrastanto, kun igwa man nin pangyayari na makagat kan ido, tulos sooot na magpasiring sa animal bite clinic tanganing matawan nin magkakanigong vaccine asin i-report an ido tanganing mamonitor ini.
Sa ibong na lado, pig-abisuhan man ni Sales an publiko na sa panahon ngunyan iyo an ruluwasan kan halas, kaya man kaipuhan an labing paglilikay dapit digde.
Enkaso man na makagat kan halas tulos man magpasiring sa animal bite clinic asin mas marhay na makuanan nin ladawan an halas tanganing maaraman tulos kun anong klase an nakakagat kun ini ba venomous o non-venomous.
