NAGA CITY – Pig-pagirumduman kan Simbahang Katoliko an mga deboto na makundusir nin Alay Lakad asin penitensya ngunyan na Semana Santa.
Sa entrevista kan Bombo Radyo Naga ki Rev. Fr. Joey D. Gonzaga, the seminary rector kan Archdiocese of Caceres, sinaysay kaini na antes paman an pag-abot kan Semana Santa, manunutaran na an mga tawong nagsasakripisyo o nagpepenitensya na naghuhuna na makakabayad na sinda kan saindang mga kasalan.
Alagad sigun ki Fr. Gonzaga, an tunay na pagpenitensya an bakong sa paagi kan pangungulog sa sadiri o pagrarapas kan likod, nin huli ta an tunay na pagbabago, iyo an pagbabagong loob, na boot sabihon an pagkumpisal kun saen pig-ako an sadiring mga kasalan asin pagbabalik sa Mahal na Kagurangnan.
An siring na penitensyang nanunutaran kan publiko an dae pigrerekomendar kan Simbahang Katoliko orog na ta an pagbabago an bakong external change kun saen an iba pigtatahuban an saindang mga lawgon.
Sigun pa ki Fr. Gonzaga, sa ibong kan saindang pagpepenitensya, piggigibo man giraray kan mga ini an saindang mga kasalan kun kaya, an tamang pagbabago, nanunutaran sa pag-ako kan kasalan, pagkakasala sa iba sa paagi kan pagkukumpisal.
Makalihis man ini, dapat man mantiniron an siring na pagbabago o an padagos na pagbabago asin dae sana matatapos ngunyan na Semana Santa.
