NAGA CITY- Nagpepreparar na an mga delegado kan DepEd-Iriga para sa papaabuton na Palarong Bicol 2025.
Sa entrevista kan Bombo Radyo Naga ki Dr. Mariano De Guzman, Schools Division Superintendent kan DepEd-Iriga, sinaysay kaini na sa presente, nagsasairarom soboot sa concentration training an saindang mga players kun saen ini an madurar pito hasta sampulong aldaw.
Sigun pa ki De Guzman, igwa man soboot pigtagama na budget para sa pagkakan kan mga players tanganing maasegurar na naitatao an saindang pangangaipuhan. Paliwanag kan opisyal, pigkaltas soboot an nasambitan ng budget sa School Maintenance and Other Operating Expenses (MOOE).
Dugang pa kaini igwang alokasyon sainda an lokal na gobierno alagad haros P6.9M na an nagamit kun kaya kaipuhan na magibuhan naman nin paagi an pagkakan huli ta dae na ini inabot kan City Fund na an orihinal na alokasyon an P7M.
Mientrastanto, pigtawan duon man kan opisyal na kun enkaso igwang reklamo huli sa kawaran nin budget, tolos soboot na magdulok sa saindang opisina tanganing mapaliwanagan na an budget an pirmeng kulang asin piggigibuhan na sana nin paagi tanganing magkasya.
Isasagibo man an Palarong Bicol 2025 sa Marso 22 hasta 29 sa Legazpi City na iyo man an maserbeng host kan nasambitan ng aktibidad.
