NAGA CITY- Pigsairarom sa psychological first aid an mga estudyante kan Camarines Sur National High School sa saindang pagbwelta sa klase ngunyan na aldaw.
Sa entrevista kan Bombo Radyo Naga ki Dr. Sulpicio Alferez, Principal kan Camarines Sur National High School, sinaysay kaini na haros mga adviser sana an naglaog sa gabos na subject kan mga estudyante sa bilog na aldaw.
Ini tangani soboot na matawan nin magkakanigong oras an mga kaakian na iistorya an saindang inagihan o naeksperyensiyahan sa Bagyo.
Sigun ki Alferez, makakatabang ini tanganing padikit-dikot na makabwelta sa saindang mga sadiri an mga kaakian huli naman sa traumatic experience na saindang kinahampang sa nakalihis na kalamidad.
Katakod kaini, magibo man nin temporary ID an nasambitan ng eskwelahan tanganing itao sa mga estudyante orog na an iba an mayo na kaini huli ta nalubog an saindang harong sa tubig baha.
Dugang pa ni Alferez, marhay man an attendance sa presente asin dikit sana an nairehistro na dae naglaog.Mientrastanto, padagos an pagkalap nin donasyon kan saindang opisina tanganing makatabang sa mga kaakian na nawaran nin gamit sa pagklase..
