NAGA CITY– Nag-walat nin mga gadan na hayop an mahewasang pagbaha sa probinsya nin Camarines Sur kawsa kan mayong untok na pag-uuran na nagpuon pa kasuudma.
Sa entrevista kan Bombo Radyo Naga ki Barangay Captain Arnold Bacares kan Burabod sa banwaan nin Lagonoy, sinaysay kaini na saro sa problema ngunian kan mga residente sa saindang lugar an pagkagadan kan mga hayop arug na sana kan mga ataman na alagang karabaw, baka asin kambing.
Sigon sa opisyal, makalihis na magbaba an lebel kan tubig, nagtambad sa sainda an mga gadan na hayop na kaibanan sa mga nalamos sa haros lampas taong lebel kan tubig-baha.
Apwera digdi, kinakarkulong maabot man sa P300,000 an danyos na pigwalat kan baha sa sektor kan agrikultura sa saindang nasasakupang barangay.
Sa ngunian, nakapuli na soboot sa saindang mga residensya an haros 400 pamilya na naapektaran kan nasambitan ng baha na paramientras munang nagtinir sa mga evacuation centers.
Kung marurumduman, dikitan pang malamos an nasambitan ng barangay official kan purbarang irescue an saiyang mga residente sa tahaw kan bahang epekto kan tail end of the cold front sa lalawigan.
