Aram baya nindo mga ka-bombo, sarong grupo kan mga squatters na iligal na naka-istar sa sarong baryo sa Burgos Province sa Spain an nag-install nin alarm system tanganing dae makalaog an iba sa saindang pig-ookupa na harong.
Susog sa report an mga residentes sa San Miguel de Pedroso an naka-alerto huli sa mga squatters na iyo naman nag-okupa kan sarong bakanteng harong sa saindang lugar.
Sigun sa mga nagkapirang mga residente, igwa soboot sindang pigbugtak na signages na nagsasabi na igwang naka-installed na alarm sa harong.
Kun habo soboot kan mga ini maeksperyensiyahan an sinapo kan dating may-sadiri kan harong dae soboot magpurbar na maglaog digde.
Pigsuspetyahan kan mga residente na an mga nasambitan ng squatters an haloy ng pigmamanmanan an property asin kan maaraman na mayo nang naka-istar sa harong duwang dekada na an nakakalihis nagdesisyon na duman na mag-istar.
Huli kaini, pigkakahaditan kan mga tawo sa lugar na posibleng malaog naman kan mga estranghero an saindang harong.
An mga dae na pinangaranan na mga squatters nagpurbar na irehistro an harong sa irarom kan saindang pangarana sa lokal na otoridad alagad sinda an nabigo.
Mientrastanto, an may-sadiri man kan property an nagsunad na nin tolong reklamo sa Guardia Civil, alagad dae pa man giraray napapahali an nasambitan ng mga indibidwal.
Sa ngunyan, padagos an pagkahadit na namamatean kan mga tawo sa lugar huli sa presensiya kan mga estranghero sa saindang area.
