Aram baya nindo mga ka-bombo, naglalangkaw an numero kan mga jovenes sa China na mawot na permanenteng mag-istar sa mga hotels. Ini nin huli ta mas barato asin mas convenient soboot kaysa magrenta o magbakal nin harong.
Susog sa report, kadakol na mga tawo sa nasambitan ng nasyon an nakikipag-negosasyon sa mga hotels para sa panghaluyang pagtinir digde.
Apwera kaya sa mas barato kaysa mag-renta o magbakal nin sadiring harong, nalilikayan pa an mga abusadong landlords, pagpirma nin mga kontrata, pagbayad nin utilities o paglilinig.
Sigun sa mga nagkapirang jovenes, an pigpapaupahan na apartment o shared apartment sa ibang mga lugar sa China an nag-aabot sa 1,000 yuan o $140 kada bulan mantang kun matinir sa mga hotel ini an nagkakantedad nin nasa 2,000 hasta 3,000 yuan.
An pakikipag-negosasyon sa mga hotel para sa panghaluyang pagtinir digde an nag-aabot sana sa 2,500 yuan kada bulan.
Kadakol na soboot an matitipid sa kantedad na ini asin sadiri pa ang kwarto o lugar asin mayong kaibahan na nag-uupa kun ikukumparar sa pagrenta.
Para man sa ibang mga jovenes, saindang na-aaprisyar an pagigin maboot kan mga hotel staffs asin an mga nagkapira pang benipisyo na itinatao kan mga hotels.
Kabali pa sa magayon na pag-istar sa mga hotels iyo an mga nagagamit na Amenities siring kan gym, parking lot asin iba pa na libredong itinatao sa siisay man na naka-istar digde.
