NAGA CITY – Padagos na pigmomonitor kan Department of Agricultur (DA)-Bicol an mga lugar na igwa nin kaso kan African swine fever (ASF) sa Bicol Region.
Sa nagin paghampang sa mga kagawad kan media ni Marcial Bustarga, DA-Bicol APCO, sinaysay kaini na sa banwaan kan Bula, Camarines Sur haros duwang barangay pa an apektado kan nasambitan ng helang sa mga orig. Kun saen, kabali na ini sa depollution.
Sa ibong man kaini, dae paman soboot kontaminado an mga slaughterhouse sa probinsya kun kaya salbado pa an mga karneng orig magin naman sa siyudad nin Naga.
Sa ngunyan mahigit man an saindang pagmonitor sa mga lugar na igwa kan siring na kaso sa orig. Pangapodan man kaini sa mga hog raiser na tulos ireport enkaso igwa nin nanutaran kan siring na helang asin dae na ini pagtago nin huli ta igwa sinda nin kakahampangon na kapadusahan.
Apwera pa digdi, igwa man nin asistensya pigtatao an Department of Agriculture sa mga maaapektaran rehistro na mga orig.
Mientrastanto, nagbaba naman an kaso kan ASF sa banwaan kan Pili kumparar kan mga nakalihis na semana.
Sigun man ki Naga City Administrator Elmer Baldemoro, mayo man nin nakakalaog na orig gikan sa Pili pasiring sa siyudad.
Padagos man an monitoring sa mga orig na pigbubudo gikan sa Naga City Abattoir tanganing malikayan na magkaigwa nin kaso kan ASF sa siyudad.
