NAGA CITY- Tinawan importansiya kan sarong abogado an pagbisto sa lambang saro antes na maglaog sa pagpapamilya o pagpapakasal.
Sa entrevista kan Bombo Radyo Naga ki Atty. Robert Miranda Gozun, Managing Legal Council, sinaysay kaini na napaka importante kan pagbisto sa magigin kapareha sa buhay para sa mas maray na iribahan kan mga ini.
Ini huli ta mas maray ini kumparar sa kun kasuarin nag-iibahan na saka pa sana maaaraman an ugali kan lambang saro.
Dugang pa ni Gozun, enkaso maray an iribahan kan sarong mag-agom masosolusyunan kan mga ini an saindang mga problema asin dae na maabot pa sa punto kan pagdedeborsyo.
Sigun pa ki Gozun, sa pagliligawan pa sana dapat maaraman na an mga negatibong ugali kan lambang saro tanganing maagi an mga ini sa tamang pag-urulay asin malikayan an pagsusuhayan.
Sinaysay pa kan abogado na dapat na magtabangan an lambang mag-agom sa pagsimbag sa mga problema na kinakahampang kan saindang pamilya. Sa siring na paagi mamamantinir an marhay na pag-iibahan kan mga mag-agom.
