NAGA CITY- Pigtawan duon kan sarong opisyal kan DepEd Camarines Sur na dae pigtutugutan kan Kagawaran an pagbayad nin kwarta para sa Brigada Eskwela.
Sa entrevista kan Bombo Radyo Naga ki Atty. Salvador Bogs Pelingon, Division Officer kan DepEd Camarines Sur, sinaysay kaini na igwang nag-iiral na panundunan na bawal an anuman na monetary contribution o donation sa mga eskwelahan.
Kun kaya sa mga magurang na dae nakakapartisipar sa Brigada Eskwela kaipuhan na igwang representante o karibay kaini.
Sigun ki Pelingon, pigbubusol soboot sa lado kan edukasyon an bayanihan system, kun saen pagtarabangan an kinakaipuhan tanganing magin marhay an kamugtakan kan mga kaakian.
Katakod kaini, pigsaysay ni Pelingon na mayo na ngunyan pigtatao na stab sa mga nagbi-brigada alagad sistematiko na an proseso sa mga eskwelahan tanganing masierto na igwang output makalihis ini.
Minsan soboot kaya kadakol an mga nagpapartisipar sa Brigada Eskwela alagad kakadikit an output na nahilingan.
Igwang mekanismo kun pano pigdedestrebwer an mga gibuhon sa mga volunteers sa laog kan eskwelahan siringman igwang in-charge na nagtataong giya tanganing mas maparekas an gibo.
Sa ngunyan, hagad giraray kan opisyal an pakikisumaro kan mga magurang, estudyante, paratukdo para sa pagsabat kan marhay na school year.
