Pig-anunsyar kan Department of Human Settlements and Urban Development (DHSUD) na hasta P30,000 tabang pinansyal an nakatalan itao kan ahensiya sa mga narautan nin harong sa Bicol Region huli sa labing panlalamasa kan Bagyong Kristine.
Ini an pigpahayag kan DHSUD sa direktiba ni Presidente Ferdinand “Bongbong” Marcos Jr. sa gabos kan ahensya nin gobierno na kaipuhan an dagos-dagos na tabang para sa mga naapektaran kan kalamidad sa nasyon.
Sigun ki DHSUD Secretary Jose Rizalino Acuzar, tolos an pananao nin unconditional cash assistance sa irarom kan Integrated Disaster Shelter Assistance Program (IDSAP).
Paliwanag pa ni Acuzar, P15-M an inisyal na pigtagamang alokasyon sa Region 5 partikularmente na sa Camarines Sur asin Albay na labing tinamaan kan Bagyong Kristine asin kadakol na mga harong an naraot.
Sa irarom kan IDSAP, P30,000 an marereseber kan mga may-sadiri kan totally damaged na mga harong mantang 10,000 man sa mga partially damaged na mga harong.
