NAGA CITY- Nagdadakol an nag-a-avail kan pigtatangrong safe card kan Philippine Red Cross Camarines Sur.
Sa entrevista kan Bombo Radyo Naga ki Maria Felisa Badiola, Chapter Administrator kan Philippine Red Cross Camarines Sur, sinaysay kaini na paglaog pa sana kan taon, magayon na an saindang nahiling pag-abot sa insurance.
Sigun ki Badiola, dakulang factor digde na aram na kan tawo an dapit sa nasambitan ng programa nin huli ta dae na sinda nasasakitan na ipabisto pa ini.
Katakod digde, nag-abot na sa labi 50 an nakapag-avail na kan safe card kan nakalihis na bulan kan Enero.
Pigtawan duon kan opisyal na importante na maabot ninda an saindang target ngunyan na taon orog na ta dakula an numero na dapat na mapanuan.
Huli kaini, padagos an pag-enkaminar ni Badiola sa publiko na mag avail kan saindang insurance mapa online o sa mismong opisina kan Philippine Red Cross Camarines Sur.
An nasambitan ng insurance an dakulang tabang sa panahon kan emerhensiya asin sa mga dae piglalaoman na pangyayari.
Sa ngunyan, pigsierto na sana ni Badiola na igwa pang nakalinyadang aktibidad an saindang opisina sa mga maabot na bulan siring kan blood letting activities, training asin iba pa.
