NAGA CITY – Pigtawan-duon kan sarong abogado na dae dapat pagdulagan kan mga naglo-loan sa lending application an saindang mga utang.
Sa entrevista kan Bombo Radyo Naga ki Atty. Michael Dela Peña, legal practitioner asin maysadiri kan sarong law firm, pigsaysay kaini na dae dapat pagdulagan kan mga parautang an saindang utang maski pa sa lending app ini.
Enot na karasonan digdi iyo an mararaot an saindang credit standing na nakapalaog man sa ley kan satuyang nasyon.
Kun saen, obligado an mga nagpapautang na creditors na ireport sa National Agencies an mga nadudulag o dae na nagbayad na mga borrowers.
Dugang pa ni Dela Peña, nin huli ta nagpirma sa kontrata, pupwede soboot sindang hapagon, dumanon sa saindang harong kun kaya mararaot man an saindang buhay.
Pig-abiso man ni Dela Peña sa mga nangungutang na makipagsettle na sana ini sa panahon kun nuarin sinda mabayad.
Alagad, piglinaw man ni Dela Peña, na enkaso ilegal an lending app, pupwede ninda ining maidepensar o dae bayadan an saindang utang alagad kinakaipohan pa kan mga ini na mapatotoohan o kaipohan nin bastanteng ebidensya.
