NAGA CITY- Nagpakol na sa 267 an numero kan mga nakumpiskar na improvised canon o boga sa bilog na Camarines Sur.
Sa entrevista kan Bombo Radyo Naga ki PCPT Liza Jane Alteza, Public Information Officer kan CSPPO, sinaysay kaini na as of December 29 nag-abot na sa 267 an mga nakumpiskar na boga kan saindang hepatura kun saen an banwaan kan Tigaon an nakagrehistro nin halangkaw na numero kan nakumpiskar na boga na nag-aabot sa 24.
Sigun sa opisyal kadaklan sa mga nakuanan kan ipinagbabawal na boga an haros mga jovenes kun kaya padagos an saindang pigsasagibong kampanya kontra digde.
Katakod digde, igwa soboot nadakop na sarong indidibidwal sa ikinasang entrapment operation na nagpapabakal nin boga online sa kantedad na P500.
Dugang pa kan opisyal, igwang nagpamalo-malo na buyer kan nasambitan ng boga na nagin rason sa pagkaka-arestrar kan nasambitan ng indibidwal na mahahampang man ngunyan sa magkakanigong kapadusahan.
Sa ngunyan, liwat na sanang pig-enkaminar ni Alteza an publiko na dae na maggamit kan anuman na klase kan paputok orog na an mga iligal tanganing magin salbado an pagsabat kan bagong taon.
