NAGA CITY – Pig-eksplikar kan sarong abogado kun tanu pinagsusugo sa ley na an mga aki na nag-eedad siete anyos pababa an karaniwang napapasiring sa ina an kostudiya sa oras na magsuhayan an sarong mag-agom.
Sa entrevista kan Bombo Radyo Naga ki Atty. Bryan Clark Zaracias, associate lawyer, sinaysay kaini na ini nin huli ta pigbibisto kan ley an mayong kapantay na pagpapadaba kan sarong ina sa saiyang aki.
Pinagtutubudan kaya na an pagpapadaba kan sarong ina an igwa nin dakulang role sa pagdakula kan sarong aki magin para sa saiyang development.
Apwera pa digdi sa siring kaya soboot na edad igwa nin mga pangangaipuhan an mga aki na kayang itao kan ina na dae kayang maitao kan saiyang ama.
Dugang man ni Atty. Jahazielle Marie dela Cruz, na kasal man o dae an sarong mag-agom sa siring na edad perming sa ina o nanay mapapasiring an aki.
Ini nin huli ta enkaso soboot na an sarong aki an yaon sa pangangataman kan saiyang ina sa siring na panahon mas naaataman sinda asin kadakol pa na aspeto an nakakatabang para sa saindang pagdakula.
Alagad, tinawan duon man kaini na parehas na magurang an igwa nin karapatan o kustodiya para sa saindang mga aki asin yaon na sana sa mga ini kun paano pag-uulayan an pagbanga kan oras para sa mga ini.
An siring man an set up an sa oras sana kan pagsusuhayan kan sarong mag-agom alagad kun magkaibahan man giraray sinda an pag-uulayan naman ninda digdi an saindang joint costudy an igwa sinda.
