Pigtawan-duon nin liderato kan Philippine Red Cross na bako sanang rescue para sa mga tawo an piggigibo kaini sa ngunyan sa mga lugar na naapektaran kan bagyong Kristine.
Nagtutubod an PRC na bako sanang mga tawo an labi na naapektaran magin an mga atamang hayop labi man na nasasakitan asin an iba pa na nasuhay sa mga pamilyang nag-aataman sainda.
Sa tahaw kan rescue operations kan Philippine Red Cross sa Camarines Sur nanutaran kaini an nagkapirang Ido na yaon sa atop kan sarong harong na lubog sa baha asin garo soboot nagugutom. Sa kataid kaini may sarong sako kan pet food.
Mayong pagduwa-duwa na nagsakat an sarong volunteer tanganing mapakakan asin mapainom an mga Ido.
Gutom-gutom na nagrani sa rescuer mantang nagkakawakawag pa an ikog kaini.
Mahihiling man sa picture na nagrani pa an mga ini sa rescuer asin garo nagpapasalamat.
Abiso man an kan nagkapirang animal righst advocate na kun igwang mga kalamidad, mas marhay na palibrehon an mga ataman gikan sa pagkakakulong o pagkakabugkos huli ta igwang tyansa na makasalbar ini kaysa abandonahon sana sa mga harong.
