NAGA CITY- Pinagpaplanuhan suboot ngonian kan Department of Agriculture (DA) na bakalon an mga ataman na hayop na nawalat kan mga evacuees sa laog kan danger zone huli sa nagpapadagos na pag-aalburuto kan Bulkang Mayon.
Ipigheras ni Presidential Spokesperson Harry Roque an nasambitang impormasyon sa ginibong press conference sa probinsya nin Camarines Sur.
Segun ki Roque, saro an nasambitang lakdang sa nabilog na plano kan DA para sa mga residente kan Albay na paramientras na nagtitinir sa mga evacuation centers.
Dugang pa kan sekretaryo, napag-olayan sa cabinet meeting na aapudon an programang ‘Two for One’ kun sain ipapakakan suboot an mga babakalon na livestock sa mga evacuees asin tatawan pa nin compensation an mga paraoma tangani na liwat na makapagpadakula nin mga hayop sa saindang pagbwelta sa saindang mga harong.
Mientrastanto, ikinahahandal suboot an pagka-prakasar kan mga klase sa mga evacuation centers sa nasambitang probinsya kun kaya segun ki Roque, napag-uyunan kan Department of Education (DepEd) asin Department of Social Welfare and Development (DSWD) na sa urog na marikas na panahon, mapatugdok nin temporary shelters tangani na dae maapektaran an pagklase kan mga estudyante urog na an mga graduating students.
