Nagsagibo nin Picket-protest an manlaen-laen na NGO asin labor groups sa SMC Central Headquarters sa San Miguel Avenue, Ortigas Center, Mandaluyong City kasuodma, Huwebes.
Ini an komo kasimbagan kan grupo sa ipapautob kan San Miguel Corporation na bagong airport fees sa NAIA sa September 14 na maabot sa 1000 porsyentong increase.
Pig-angat man kan mga grupong Partido Lakas ng Masa (PLM), Sanlakas, asin Buklaran ng Manggagawang Pilipino si SMC CEO Ramon Ang na dae na kini pagkakitaan pa an pagpapakarhay kan NAIA, siring kan ibinida kan bilyonaryo na gigibuhon kaini sa isyu kan baha sa Metro Manila, kun totoong padangat kaini an nasyon asin gusto kaining tabangan an Pilipino.
Sigun ki Ka Leody de Guzman, Presidente kan PLM, pantolo na sa pinakamayamang Pilipino si Ang, na kumita gikan sa mga Pilipino.
Nagluluwas kaya soboot na mayo pang pigluluwas na puhunan an SMC sa pagpapakarhay kan airport, asin garo kukuonon man an pondo sa pagpapakarhay kan airport gikan sa mga bagong dugang na singil.
Sinabi pa ni Ka Leody na preparado man na magbayad an mga pasahero kan airport fees kun mas marhay na muna an mga serbisyo alagad an nangyari soboot, an labi 40 milyong Pilipinong pasahero kan NAIA an ma ‘front load’ sa pagpopondo kaini.
Kabaliktaran man soboot ini sa pagtangro ni Ang kan pagresolbar sa problema sa pagbaha sa Metro Manila.
Nagin halipot man an paglalahad kan mga obrero kan saindang saloobin sa nasambitan ng rally makalihis sindang itaboy kan mga pulis asin kan mga guwardiya kan SMC.
