NAGA CITY- Masasabotan suboot kan Overseas Workers Welfare Administration (OWWA) kun dae magsunod an mga Overseas Filipino Workers (OFWs) sa pigpapautob na voluntary repatriation kan gobyerno kan Pilipinas urog na an may mga reklamo sa saindang mga amo sa Kuwait.
Sa entrevista kan Bombo Radyo Naga ki Rowena Alzaga kan OWWA Bicol, sinaysay kaini na halangkaw an sweldo na nareresibe kan mga Pinoy na nagta-trabaho sa nasambitan na nasyun kun kaya dawa delikado, mas pigpipili kan mga ini na magtinir sa nasambitan nang lugar.
Kinumpirmar man ni Alzaga na may mga Bicolano OFWs sa Kuwait na natabangang maipuli sa nasyun makalihis an suboot pangmamaltrato kan saindang mga amo.
Sa ngonian, maabot suboot sa labi sa 10,000 na mga Bicolano an presenteng nagta-trabaho sa nasambitan na nasyun.
Mientrastanto, nangapoduan man si Alzaga sa pamilya kan mga OFWs sa Kuwait na tulos makipagkoordinar sainda tangani na matabangan kun en kaso magdesisyon an mga ini na magpuli na sa nasyun.
