NAGA CITY- Ikinamundo kan nagkapirang mga overseas Filipino workers (OFWs) an nangyaring pagbitay sa Pinay OFW na si Jakatia Pawa.
Sa pakikipag-olay kan Bombo Radyo Naga ki Ms. Ivy, na hale sa Camarines Sur asin presenteng nagtatrabaho sa New York, sinaysay kaini na ikinamundo ninda an pagbitay ki Pawa sa Kuwait suodma.
An ley suboot sa ibang nasyon, mas mahigot kun ini ikukumparar sa ley na pigpapautob sa Pilipinas.
Sigon pa ki Ms. Ivy, nakakatampo man na isipon na nagkapirang mga foreigners sa Pilipinas an na-a-abswelto sana sa saindang mga kaso huli sa kakulangan kan mahigot na ley sa nasyon.
Mientrastanto, sinaysay man ni Ms. Ivy na komo sarong OFW, kinakaipuhan na andam sinda asin pusog an boot sa paghampang sa mga problema.
Huli naman ta solamenteng an Kagurangnan sana an saindang kasurog sa ibang nasyon urog na kun igwa sindang kinakahampang na mga problema.
