Nagtatabangan na an mga otoridad asin mga volunter tanganing ma-contain an soboot oil spill na nangyari sa San Pedro, Laguna.
Sigun sa San Pedro City LGU, nagpuon ini kasunod kan pagkasulo kan Kengian Complex sa Barangay San Antonio. Nagpakol na sa 13 bodega an nasulo kun saen sa sarong bodega igwa nin naka-imbak na 200 drum kan motor oil.
Sigun sa LGU, nagdeploy na an oil spill coordinating council nin mga oil spill boom sa San Isidro River kun saen kinahahandalan na nagkuriyat an nagtagas na langis.
Sa ngunyan, napupugolan man an pagkuriyat kan langis alagad pigbabantayan kan Philippine Coast Guard kaiba an mga Bantay Lawa Volunteer sa posibleng pagkaka-apektar kan sikat na Laguna lake asin iba pang katubigan sa Laguna. Nagsasagibo na man an Bureau of Fisheries and Aquatic Resources (BFAR) nin mga water sampling tanganing maaraman an kalidad kan tubig.
Nagsasagibo man an BFAR nin fish sampling sa mga sira sa San Isidro River tanganing maaraman kun apektado an mga ini sa nagtagas na langis.
