NAGA CITY – Liwat na nagpagirumdom an mga otoridad sa publiko na magin malikay sa mga nagkukuriyat na manlaen-laeng klase kan scam.
Sa entrevista kan Bombo Radyo Naga ki PLt. Angelo Babagay, team leader kan Camarines Sur and Camarines Norte Provincial cyber response team, nagpagirumdom ini sa mga residentes na dae basang na magtao nin mga personal na impormasyon sa mga nagpapabistong mga personahes kan ahensya kan gobierno.
Mas makakamarhay soboot na aramon muna kun igwa talaga nin siring na programa an ahensya tanganing makalikay na maloko kan mga scammer.
Dugang pa ni Babagay, dae man basang na mag send nin mga ID orog na sa online huli ta pupwede ining gamiton kan mga scammer sa saindang mga salang gibo.
Sigun pa sa opisyal, pupwedeng gamiton an mga siring na ID sa paggibo nin mga pekeng account na magagamit sa pambibiktima kan iba pang tawo na posibleng magresulta sa mas seryosong mga sitwasyon.
Sa ngunyan, pagirumdom na sana ni Babagay na dae tolos na magtubod sa mga naglalakop na manlaen-laeng programa na pigtatangro kan mga dae bistadong indibidwal tanganing malikayan na mabiktima kan scam.
