NAGA CITY- Dae pa pigtutugutan na maglawod sa kadagatan kan Pasacao an mga parasisira sa nasambitan ng lugar.
Sa entrevista kan Bombo Radyo Naga ki Arnel Ama, Barangay Kagawad kan Committee on Agriculture kan Barangay Balogo,Pasacao, sinaysay kaini na madepende soboot sa panahon an pag-lift sa kasuguan para naman sa kasalbaduhan kan mga parasisira.
Sigun pa ki Ama, kan nakalihis na Bagyong Pepito, mayo man nadanyaran na mga bangka nin huli ta amay nakapagtao nin abiso sa mga fisherfolk asin amay man na nakapreprar an mga ini.
Dugang pa kan opisyal, dakulang tabang sa saindang lado na nagpapautob kan mga panundunan an pagsunod kan saindang mga nasasakupan para sa pagmantinir na zero casualty sa tuyong igwang kalamidad.
Mientrastanto, sa ibong na lado, nagin dakula man soboot na katabangan an pagtatanom nin mga gulay nin huli ta napapakinabangan ini sa panahon kan kasiributan asin nakakadugang sa mapagkukuanan nin pagkakan.
Sa ngunyan, pagirumdom na sana liwat kan opisyal sa gabos na pirmeng magsunod sa mga abiso kan saindang kanya-kanyang LGU tanganing makalikay sa anuman na katibaadan.
