NAGA CITY- Pigsaysay kan sarong konsehal sa siyudad nin Naga na compliance man an mga paratienda sa Naga City People’s Mall sa pigpapautob na price freeze.
Sa nagin paghampang sa mga kagawad kan media ni Naga City Coucilor Jess Albeus, sinaysay kaini na sa saindang padagos na pagmonitor kaibahan an DTI haros kadaklan sa mga paratienda an nagsusunod man sa nag-iiral na price freeze sa bilog na siyudad.
Alagad, pig-ako man ni Albeus na igwang kadikit na pagdugang sa kantedad kan Noche Buena Products na ginagamit sa paghanda sa pasko asin bagong taon. Kun kaya ini man an padagos na pigbabantayan kan Department of Trade and Industry.
Sa ibong na lado, nanutaran sana an paglangkaw kan barakalon orog na sa presyuhan kan gulay makalihis an bagyong Kristine nin huli ta masakit soboot an suplay kan gulay huli man sa bakong marhay na daloy kan transportasyon.
Sa ngunyan, bweltada naman sa normal an presyuhan kan gulay sa bilog na siyudad.
