NAGA CITY- Pigtawan duon kan sarong opisyal kan DepEd Camarines Sur na an siisay man na paratukdo na madadakop na nangangampanya o igwang pigsusuportaran na kandidato an mahahalian nin lisensiya.
Sa entrevista kan Bombo Radyo Naga ki Atty. Salvador Bogs Pelingon, Division Information Officer, DepEd CamSur, sinaysay kaini na an mga paratukdo an Non-Partisan na boot sabihon derechos sana kan mga paratukdo na magboto kan saindang napipisil man na kandidato.
Marurumduman, igwang mga paratukdo an maserbe sa ikukundusir na 2025 National and Local Elections kun saen pig-abisuhan man an mga ini na mantiniron an tranparency asin magin tapat sa saindang pigsumpaan na tungkulin.
Dugang pa kan opisyal, malinaw soboot an deriktiba kan Department of Education na non political an mga paratukdo.
Mientrastanto, pigheras man ni Pelingon na kadakol soboot na mga benipisyo an mga itinatao kan gobierno sa mga paratukdo siring na sana kan legal assistance para sa mga ini na igwang kinakahampang na kaso o reklamo.
An nasambitan soboot na tabang an libre na itinatao tanganing mas matabangan pa an mga paratukdo bako sana sa Bicol Region kundi magin sa bilog na Pilipinas.
Sa ngunyan, hagad na sana kan opisyal na magin marhay an isasagibong eleksyon sa maabot na bulan kan Mayo.
