NAGA CITY – nakabweltada na sa siyudad nin Naga an team na nagtabang sa probinsiya kan Masbate na labing naapektaran kan Bagyong Opong.
Sa nagin paghampang sa mga kagawad kan media ni Raynor Rodriguez, pamayo kan City Disaster Risk Reduction and Management Office Naga, sinaysay kaini na sa ibong kan challenging na sitwasyon na kinahampang kan nasa 17 na crew na kinababalihan kan CDRRMO, PSO asin ENRO nagin maogma man an mga ini sa saindang pagtabang sa clearing operations sa Masbate.
Sigun ki Rodriguez, na-assign an team sa Aroroy Masbate kun saen an lugar an mabolod asin dakol na kahoy an nagrasay sa mga eskwelahan asin salog.
Dugang pa kan opisyal, nagtinir nin nasa walong aldaw an nasambitan ng team alagad kinaipuhan nang magpuli ikaaagahan kan aldaw nin Domingo. Paliwanag kan opisyal, igwang mga functions pa an mga ini sa siyudad na kaipuhan asikasuhon.
Mientrastanto, naoogma man si Rodriguez huli ta saindang namatean na naapresyar kan mga taga-Masbate an tabang na ginibo kan Naga maski sa halipot na panahon.
Sa ngunyan, pigsierto na sana kaini na preparadong magtabang an siyudad nin Naga sa mga pagtaraid na lugar sa panahon kan kadipisilan asin emerhensiya.
