NAGA CITY-Tinawan-duon ni Camarines Sur Representative Lray Villafuerte sa Armed Forces of the Philippines (AFP) na tupadon an pahayag kaini na poproteheran an mga Pilipinong parasisira sa West Philippine Sea.
Mensahe ini ni Villafuerte sa AFP sa hampang ka nakatalaang pagpapautob kan China puon Hunyo 15 nin 60-aldaw na detention policy sa mga “trespassers” sa South China Sea damay an parte kan satuyang teritoryo sa West Philippine Sea.
Kawsa kaini, pighagad ni Villafuerte sa Philippine Navy, Philippine Coast Guard (PCG) asin Bureau of Fisheries and Aquatic Resources (BFAR) na magdugang nin kusog na presensya sa WPS tanganing masierto an proteksyon sa satuyag mga kababayang parasisisra.
Sigun ki Villafuerte, dapat panindogan kan liderato kan AFP an pahayag kaini na mayong dapat ikahandal an mga Pilipinong parasisira kontra sa posibeng harassment o panggigipit kan China sa West Philippine Sea kun saen nagpapautob na man ini nin fishing ban.
