NAGA CITY – Tinawan duon kan sarong abogado na dae na kaipuhan nin doktor o psychiatrist tanganing patotoohan na igwa nin psychological incapacity an sarong tawo.
Sa entrevista kan Bombo Radyo Naga ki Atty. Jerwin Dave Patacsil, CPA, MBA, tax lawyer, professor sa Far Eastern University, sinaysay kaini na an makakapagpatotoo digdi an mga tawong nakapalibot sa sarong tawo siring kan saiyang mga amigo, mga kaparientes, ka trabaho asin mismong an saiyang agom o partner.
Alagad pupwede pa man giraray na maghagad nin opinyon gikan sa mga eksperto alagad baku na ining mandatoryo. Dugang pa ni Patacsil, pag-abot naman sa pagsusunad nin annulment, sulamenteng an inosenteng agom sana an pupwede kaining magsunad.
Dae man soboot pigtutugutan na magsunad nin annulment an sarong agom na nagkasala o nangaliwa. Dae man pigtutugutan na an mga magurang an magsunad kaini para sa saindang aki huli ta pribadong isyu ini kan sarong mag-agom.
Mientrastanto, otomatiko sanang mapapawalang bisa an kasal kan sarong mag-agom enkaso binawian nin buhay an saro sa sainda o kaya naman an nawara nin halawig na panahon asin dae na nahiling pa. Alagad enkaso nagsuhayan sana man o dae na nag-iibahan sa laog kan harong dae man mawawaran nin bisa an kasal kan mga ini.
