NAGA CITY- Marereseber na kan mga pulis an saindang health maintenance organization (HMO) cards sa Hulyo.
Ini an magayon na bareta ni Philippine National Police chief Gen Rommel Franciso Marbil kan pangenotan an paglulunsar kan PNP Family Day sa Camp Crame.
Pigsaysay ni Marbil na an kada health maintenance organization card an igwang P40,000 na magagamit kan mga pulis orog na enkaso igwang medical emergencies. Alagad dae pigpahayag kan opisyal an pangaran kan health maintenance organization.
Pigsaysay man ni Marbil na ngunyan sana nagkaigwa nin sadiring health card an mga pulis, na magtatao sa sainda nin kasiertuhan na makakareseber sinda nin tolos na pag-aatamang medikal dawa na mayo sindang kwarta.
Maski igwa nin Health Service an 232,000 na mga pulis, pigsaysay man ni Marbil na mayong ospital an police force sa gabos kan probinsya na pwedeng dumanan kan mga pulis enkaso magkaigwa nin emergency.
