NAGA CITY – Tinawan duon kan sarong abogado na kaipuhan na lisensyado an sarong real estate broker.
Sa entrevista kan Bombo Radyo Naga ki Attorney Randy Alvizo, sarong legal practitioner kan sarong law firm, sinaysay kaini na dapat magkua an sarong real estate broker nin lisensya sa irarom kan ley.
Ini nin huli ta kun an sarong broker ma-practice nin real estate brokerage mantang mayo nin lisensya, posible ining makulong nin dai malampas nin apat na taon, asin mapapatawan nin penalidad na dai mababa sa ₱200,000.
An remedyo digdi an tolos na i-report sa National Bureau of Investigation (NBI) an taong nagpa-practice na mayong lisensya tanganing tolos ining madakop.
Masusunadan man nin kasong kriminal sa irarom kan Real Estate Service Act o Resa Law an sisay man na magpapractice nin Real Estate Brokerage na mayong lisensya.
Tangani na magin sarong Real Estate Broker kaipuhan na mag-adal nin Bachelor of Science in Real Estate Management na sarong 4 year course, asin kaipuhan nin mag-take kan board exam kaini na pigreregulate man kan Professional Regulation Commission.
Sigun pa ki Alvizo, an pagigin Real Estate Broker lisensyado man siring kan ibang mga professionals, ini man an rason kun tano kun ma-konsulta sa mga ini kaipuhan na bayadan sinda nin huli ta pinag-adalan ninda an Real Estate Brokerage.
