Nagpahayag nin pagkabahala an mga sabungero manungod sa propwestong Senate Bill No. 2975 o Revised Animal Welfare Act na inisponsor ni Senador Grace Poe, nin huli ta pwedeng mapabali an sabong sa mga aktibidad na ipagbabawal.
Sigun ki Joey Sy, beteranong gamefowl breeder asin man host, mawawara an sarong sinaunang tradisyon asin man kabuhayan kan rinibong Pilipino kun maibabali an sabong sa mga ipinagbabawal na animal fights.
Sigun pa ki Sy na posibleng madamay an sabong kun dae ini lilinawon. Pinag-uyunan ini kan co-host kaining si Eddie Boy Ochoa na nangangapudang ideklarar an sabong komo parte kan pambansang pamana tangani dae ini mapagbawalan.
Mientrastanto, pigtawan duon ni Atty. Arturo De Castro, sarong gamefowl breeder asin sabungero, na mayo sa propwestong ley an pag-exempt sa sabong, asin ini an posible man na magkawsa nin “kiss of death” sa mga politikong nagsususporta digde.
Marurumduman na kan nakalihis na Hunyo 2, inaprubaran kan Senado sa ikatulo asin huring pagbasa an Senate Bill 2975, na obhetong wakasan an animal cruelty. Naenot man na inaprubaran kan Kamara an propwestong House Bill 11254, na nagbabawal sa online sabong.
